SARIKEI: Pengelikun jalai alun iya nya tanggungpengawa begulai lalu 'Sarawak Traffic Games' ngayanka chara ti proaktif dalam nyikap rebak biak enggau penemu sereta pengelandik pengelikun jalai alun ti endang beguna.

Menteri Perengka Pengangkut Sarawak Dato Sri Lee Kim Shin madah, program tu ukai semina pekit tang nyadika pelasar dinamik dalam pengawa belajar enggau nyungkak dalam ngemeranka penyedar entara komuniti.

“Dalam kitai terus ngerembaika program tu, juluk kitai iya nya nentuka lalu pengelikun jalai alun ulih diberi enggau besai ke selampur Sarawak.

“Sarawak Traffic Games ngembuan tiga juluk besai iya nya ngangkatka penyedar enggau meri pelajar ngagai bala nembiak bekaul enggau atur jalai alun, papan tanda sereta ngemeranka pengellikun pemun.

“Kedua iya nya meri enggau mantaika ngagai semua ti bekaul enggau program tu dalam pengawa beraban sereta runding ti kritis nengah simulasyen trafik ti interaktif,” ku Lee.

Iya madah munyi tu lebuh ti bejaku maya pengerami bejadi 'Sarawak Traffic Games' di Taman Lalulintas Sarikei, bedau lama ti udah.

Beserimbai enggau tu, ku Lee, batang tuju ti ketiga ngatur program tu iya nya ngenegapka bala pensereta tu nyadi duta jalai alun di sekula enggau komuniti.

Ku Lee nambah, bisi sekeda program bukai ungkup program tu baka Pekit Pidato Pengelikun Jalai Alun dikena ngenegapka Sarawak Traffic Games enggau ngemeranka runding ti kritis sereta penegap komunikasyen entara raban nembiak.

“Statistik kes bebadi jalai alun di Sarawak ti agi ngirauka ati, enggau ti kitai deka minta semua deriba ngambika seruran ngasika atur pengelaju sereta mai perengka pengangkut enggau komited.
“Sarawak Traffic Games nyadika lalau ti berat ngagai penguna jalai alun diatu sereta jemah ila ngambika seruran ngasika atur jalai alun.

“Ngagai bala nembiak, kitai deka meransang kita ngambi bagi enggau aktif dalam aktiviti sehari tu lalu mai pulai penemu ngagai sekula enggau komuniti sereta begulai ngangkatka budaya pengelikun enggau tanggungpengawa di jalai alun,” ku Lee nambah.

Oleh Kepu Sidi (Kredit : Utusan Borneo)